澳洲政府延長港人嘅臨時工作簽證 (Temporary Skilled Visa) 及畢業生簽證至5年，更聲稱可以喺5年後提供申請永居嘅途徑。聽落好似好簡單，但係澳洲其實對申請永居仍然有一定要求，而針對港人嘅永居計劃細節仍然未出台，5年後係咪真係可以成功移民？似乎仲係未知之數。
如果想經澳洲呢個政策申請到澳洲5年簽證，你有兩個選擇，工作或留學。
工作簽證
臨時工作簽證 (Temporary Skill Shortage Visa, 482 Visa)
482簽證包括及中長期職位。只要你嘅工作資歷及申請職位符合澳洲技術職業列表 (Skilled Occupation List)中，就符合基本申請資格。
| 簽證類別 | 需符合列表 |
| 短期工作簽證職位 (Short-term Stream) | STSOL (短期技術職業列表) |
| 中長期工作簽證職位 (Medium-term Stream) | MLTSSL (中長期技術職業列表) ROL (偏遠地區職業列表) |
除咗職業on list之外，當然你仲要符合以下要求：
- 滿足英語要求，IELTS 5.0分或以上；
- 累積至少兩年工作經驗，部分工種會要求申請者通過職業評估，評估會由你嘅行業相關機構負責。除咗夠工作經驗同埋熟練嘅技術外，以及相關專業資歷或牌照。留意返，喺香港適用嘅工作技能或資歷，澳洲當地認唔認可就係另一個故事喇！
- 獲得僱主擔保及提名。聘請你嘅僱主必須獲澳洲當局認可，有擔保資格，而且你嘅僱主亦都肯為你俾擔保費。
偏遠地區州擔保技術移民簽證 (Skilled Work Regional (Provisional) Visa, 491 Visa)
491簽證與482簽證嘅申請條件相似，同樣都要滿足英語、工作經驗要求，並獲得僱主擔保及提名。除此之外，仲要喺澳洲指定偏遠地區工作或者學習3年，每年都符合年薪要求 (澳幣$53,900)，確保你嘅工種仍然喺緊缺職業名單上，就有機會轉換成191永居簽證。
畢業生簽證
臨時畢業生簽證 (Temporary Graduate Visa, 485 Visa)
喺澳洲院校就讀兩年或以上嘅全日制大學課程並畢業後，就可以申請485簽證，港人同樣可以喺澳洲逗留5年。申請人必需為50歲以下，一生只可以申請一次，需滿足一定英語要求。當你累積到3年工作經驗後，並且你嘅專業工種仲喺澳洲短缺行業名單裡面，就可以轉186永居簽證。
咁香港人可以喺澳洲留5年，感覺上好似容易咗拎到永居喎！事實又係咪咁美好呢？
香港人雖然可以憑住簽證喺澳洲留5年，但正如我哋喺開頭提及嘅，住5年後申請永居並唔係無條件拎PR，而要符合返原先簽證或永居簽證嘅要求，甚至可能有更多條件仲未公布，批核時間更加係未知之數。
澳洲呢個政策同英國BNO唔同，澳洲對香港人嘅態度係招攬人才，希望你哋對當地經濟及社會有貢獻，而唔會俾你隨隨便便申請PR，條件絕對唔會太過寬鬆，確保每個留低嘅人都係人才。
而且，澳洲每年都會重新檢視及微調移民政策，留喺當地5年嘅風險較高，更何況宜家由於疫情影響，將來變數就更大，你好難確保到你可以安穩咁打住工渡過嚟緊嘅5年。到最後有冇可能只係喺澳洲浪費咗5年光陰？值唔值得去，就要由大家自己評估風險喇。
